Удмурт егитъёслэн мерлыко «Шунды» огазеяськонзы Удмурт Элькунысь физкультурая, спортъя но егитъёсын ужан политикая министерствоен, Удмурт Элькунысь Йӧскалык политикая министерствоен но Эшъяськон юртэн валче Быгатӥсь нылпиос понна «Шундыкар-2015» улосвылкуспо лагерь радъяло.
Ужрад 6-15-тӥ гудырикошконэ «Ёлочка» лагерьын ортчоз. Дунневыл тенденциосты удмуртлыкен герӟаса, «Шундыкар» лагерь удмурт лулчеберетэз гажась но сое азинтӥсь, анай кылзэс, выжыоссэс, сям-йылолъёссэс дунъясь муртъёсты будэтэ. 20 арлэсь ятыр кыстӥськись проектлэн валтӥсь ужпумез – удмурт нылпиослэсь быгатонлыкъёссэс шараян но соосты азинтон.
Дас нунал ӵоже пиналъёс туала удмурт культуралэн пӧртэм ӧръёсыныз тодматско. Соос пӧлын дӥськут дизайн, литература, фольклор, крезьгур дунне, суредаськон но мукет. Котькуд нылпи аслыз тунсыко луись ӧрез бырйыса, ӧнерчиосын артэ тодон-валанъёссэ муромытэ. «Шундыкар-2015» лагерьлэн валтӥсь темаез – «Сюрес». Быръем тема мур пуштросо: вань ёросъёсысь сюресъёс ваё «Шундыкар» лагерьлэн ӧсъёсыз доры, тросэзлэн нылпиослэн творческой сюрессы ӵапак «Шундыкар» лагерьысен кутске но быдэс улонзылы инъет луэ. Трос аръёс ӵоже ужась проектлэн аслаз сям-йылолъёсыз кылдӥзы ини. Котькуд ар сямен ик, таяз аре но нылпиос понна тунсыко ужрадъёс, аспӧртэмлыко адямиосын пумиськонъёс, шулдыръяськонъёс радъяськозы. Нуналлы быдэ пиналъёсын ужалозы капчи мылкыдо вожатойёс но ас ӧрзэс тодӥсь-валась специалистъёс. Вераны кулэ, таяз аре лагерез радъясьёс пӧлын трос выль адямиос. Оскымон, соос лагерьлэн историяз выль шӧм пыӵатозы, нылпиослы зэмос юрттӥсьёс, эшъёс луозы.
Таяз аре лагерь возьма 120-лэсь ятыр быгатӥсь нылпиосты. Удмурт Элькунысьтымы сяна проектэ пыриськыны быгатозы Татарстанысь, Башкортостанысь, Марий Элысь, Киров, Свердловск, Перм улосвылъёсысь нылпиос. Уж 11 ӧръёсъя радъяськоз: суредаськон, литература, фольклор но эстрада, журналистика, крезь лэсьтон, видеоискусство, дӥськут дизайн. 2015-тӥ арлэн эшшо одӥг аспӧртэмлыкез — кык выль направление: крезьгуро инструментъёсын шудӥсьёс но эктӥсьёс. Матысь дыре лагерез радъясьёс, ӧнерчиос но вожатойёс котырес ӝоке люкаськозы но пыр-поч ужан программаез радъялозы.
Юанъёсты кылдӥзы ке, таӵе номеръя вазиськыны быгатӥськоды:
(3412) 63-10-44, +7904 837 14 33, (Тронина Ольга Алексеевна, «Шунды» огазеяськонлэн тӧроез).