Выль арез пумитан азьын асьмеос ортчись арлы йылпумъянъёс лэсьтӥськом. Озьы ик мерлыко огазеяськонъёсын но. «Шунды» дась тӥледлы ортчытэм арез сярысь вераны.  

«Шунды» огазеяськон 20 арлэсь ятыр ужа ни удмурт егитъёс понна, удмурт кылэз, культураез утён но азинтон бордын. Таиз но ар пӧртэм ӧй вал: быдэсъяськизы «Шундылэн» проектъёсыз, вордӥськизы выль малпанъёсыз, озьы ик огазеяськон выль бамзэ усьтӥз — туэ выль тӧро но выль правление быръемын вал.

Арез, дышем сямен «Шунды» усьтӥз егит азьветлӥсьёс понна «Вамыш» лагерен. Туэ со люказ мыло-кыдо студентъёсты но бадӟым классъёсын дышетскисьёсты. Смена ӵоже соос пӧртэм тодон-валанъёс басьтӥзы: видеоискусство, ужрадъёсты радъян, звукорежиссура но вожатоен ужан. Со сяна психологъёс ортчытылӥзы пӧртэм треннингъёс, кураторъёс – тунсыко шудонъёс, позыръяськонъёс.

Сям-йылоллы пӧрмем проектъёс туэ выль сямен усьтӥськизы.  Шулдыр гужем нуналъёсты тунсыко каризы ужась егитъёс понна «Юр-Яр» турслёт, быдэ вуэмлы сӥзем «ЭРУ» шулдыръяськон.

«Вераськисько анай кылын» акция улсын егитъёс машинаос вылэ удмурт наклейкаос тыризы: «Вамыштӥськод ке, мед кылёз пытьы», «Дыртись таракан пӧзись пуртые усе», «Сюрес усьтиське мынисьлы».

«Куарагур» — огазеяськонлэн одӥгез тужгес но адӟымон проектэз. Куинетӥ «Куарагур» улсын гожтэмын вал 10 выль удмурт кырӟан. Проект йылпумъяськиз бадӟым концертэн, кытын тужгес но усто кырӟасьёсты, кылбурасьёсты, крезьгурчиосты пусйизы. Озьы, Ксения Ахметхановалэн «Тонэ веръян» кырӟанэзлы клип лэсьтэмын вал, угось нылаш вормисе потӥз. Нош кылбурасьлэн Анна Будиналэн «Гочатыса» кылбур бичетэз югыт дуннеез адӟиз.

Дышетскисьёс понна тужгес но тунсыко вакыт – гужем. Удмурт нылпиос чидатэк витизы «Шундыкар», «Тулкым», «Усточикар» лагерьёсты. Отын соосты возьмазы тунсыко адямиосын пумиськонъёс, удмурт шудонъёс… Выль малпанъёсын ӧнерчиос быгатӥзы  нылпиослы выль тодон-валанъёс сётыны. Туэ «Шундыкар» лагерьысь вожатойёс понна дышетон семинар азьпал ортчытэмын вал.

Со сяна, ар выль ужрадъёслы но узыр луиз. Тужгес но бадӟымез, пушйисез – удмурт визсез сынанъя «Шудком» клуб. Со кельше «Что? Где? Когда?» но «60 секунд» шудонъёслы.  Клуб радъямын пӧртэм арлыдъем удмуртъёсты огазеян, кенешон, визь сынан инты кылдытон понна. Котькуд толэзь ӵошатскизы студентъёс, журналистъёс, тодосчиос, азьветлӥсьёс. Нош толсуре бадӟым финал ортчиз. Отын ик вормись тодмо луиз – «Валамон-Паримон» команда.

Туэ «Удмурт дунне» газет «Шунды» огазеяськонлэн юрттэменыз радъяз литературая «Ингож» семинар, кытчы люкаськизы ог 25  егит гожъяськисьёс. Кинлы ке тунсыко потэ киносценарий гожтон, кинлы ке – кылбур я верос пӧрмытон. Тодмо писательёс, литературоведъёс, критикъёс 2 нунал ӵоже эскеризы соослэсь ужъёссэс, сётъязы визь-кенеш. Семинарлэн емышез — «Ингож» альманах.

2016-тӥ ар кинолы сӥземын вал. «Шунды» но талэсь палэнэ ӧз кыльы. Егит удмурт сценаристъёсты, режиссёръёсты, актёръёсты огазеяз «Синучкон» школа. 4 нунал ӵоже Кияса ёросын бадӟым уж пӧзиз, озьы кылдӥз вакчи удмурт кино. Ӝоген со учкисьёс доры вуоз ни. Нош «Кизили пус» проектлэсь выль килпъёссэ тросэз адӟизы ни, дыр. Анна Образцовалэсь, Ксения Ахметхановалэсь, Светлана Ручкиналэсь, Наталья Бурановалэсь, «Peace Pu» группалэсь но Эльвира Панченколэсь ужъёссэс вотэсбамъёсысь шедьтыны быгатоды.

Эшшо одӥгез бадӟым вормон – со удмурт кылэз дышетонъя «Чингыли» мультимедийной курс. Солэсь потэмзэ али, гурысь пӧсь табанез кадь, возьмаськомы. Со юрттоз нылпиослы, туала амалъёсты кутыса, удмурт культура пумысен тодон-валанъёссэс будэтыны, удмурт кылын вольыт вераськыны.

Озьы ик, ар ӵоже огазеяськон тыршиз ёрос ёзэтъёсызлэсь ужзэс азинтыны. Кивалтисьёслэсь тодон-валанзэс, мылкыдзэс ӝутон, ёросысь егитъёсты бугыртон вылысь «Шунды» азьло сямен ик радъяз кӧня ке проектсэ: «Вуюись» семинар, «Лаборатория «Шунды» (со улсын «шундыос» ёросъёсы мастер-классъёсын но дискотекаосын потало). Озьы ик палэнын улӥсь удмуртъёс сярысь но вунэтэмын ӧй вал. Марий Элын но Татарстанын удмурт лулчеберетлы сӥзем нуналъёс ортчизы.

Тужгес но бадӟым ужрад возьмаз «Шундыосты» куартолэзе. 14-тӥ конференциын берло 2 арлы йылпумъянъёс лэсьтэмын, выль тӧро бырйемын вал. Табере Ольга Трониналэсь интызэ басьтӥз Алина Чернова. Солы ужаны юрттоз аслаз командаез, 13 мыло-кыдо студентъёс.

Нош 2017-тӥ арын огазеяськон озьы ик тыршоз тӥ понна, егитъёс: ёросъёсысь азьветлӥсьёсын но ужась егитъёсын умойгес ужзэ радъялоз, вотэсбамъёсты серметалоз, ужъёссэ азинтоз! Милям ужамы пыриськыны вань удмурт егитъёсты ӧтиськом.

«Шунды» правленилэн ёзчиосыз дырто ӟечкыланы лыдӟисьёсты матэктӥсь Выль арен! Егитъёс мед луозы задоресь но йӧноесь. Тӥледын ӵош ми эшшо но тросгес тунсыко ужъёс лэсьтыны быгатомы. Котьку мед пиштоз шунды! Выль арен! Выль шудбурен!

Мария Емельянова

«Дарт» гаезтлэн 95-тӥ номерисьтыз