Удмурт егитъёслэн мерлыко «Шунды» огазеяськонзы  «Куарагур» («куара» — звук, «гур»- мелодия, «куарагур» — мелодика) проектлэн кутскемез сярысь ивортэ.

Проект егит удмурт гожъяськисьёсты, композиторъёсты но кырӟасьёсты шараян но азьланяз юрттэт сётон понна кылдытэмын. Проектэ 16-30 аресъем удмурт кылын вераськись муртъёс пыриськыны быгатозы.

«Куарагур» 5 толэзь куспын кыстӥськоз – 2013-тӥ арлэн шуркынмонысеныз 2014-тӥ арлэн южтолэзёзяз. Проект улсын егит удмурт гожъяськисьёс, композиторъёс но кырӟасьёс огъя продукт кылдытозы – удмурт кылын выль кырӟан. Азьланяз малпамын 10 тужгес но усто кырӟанъёсты студиын гожтон, элькунысь 5 ёросъёсын  концертъёс пуктон.  Йылпумъясь гала-концерт Ижкарын ортчоз. Отын ик вормисьёслэн нимъёссы шараямын луозы. Тужгес но усто гожъяськись кылбуръёсыныз бичет поттыны быгатоз, нош кырӟась – клип гожтыны.

Проектэз радъясьёс оско, «Куарагурез» улонэ пыӵатон улсын, удмурт эстрада тунсыко амалэн гожтэм кырӟанъёсын но выль нимъёсын узырмоз шуыса. 

Юанъёсын вазиськыны луэ Тронина Ольга Алексеевналы (8 904 837 14 33,              (3412) 63-10-44)