«Арт-экспедиция», ойдо кошким! Кык арня пала Удмурт шаертӥ «Арт-экспедиция» вамышъяз. «Шунды» огазеяськонысь егитъёс фольклор бичазы, мастер-классъёс ортчытъязы, тунсыко адямиосын пумиськылӥзы, гуртъёсын тодматскизы.
Проектэз улонэ пыӵатӥз «Шунды» огазеяськонлэн кивалтӥсез Ольга Тронина. Со быгатӥсь удмурт егитъёсты огазе люказ но шуиз: «Гурт калыкез тодматоно городысь удмурт культураен, гуртысь егитъёсты пӧламы кысконо». Зэм но, али вераны луоз, городысь удмурт культура, гуртэн ӵошатыса, узыргес но пӧртэмгес шуыса. Удмурт егит адями городэ вуыса гинэ анай кылыныз данъяськыны но удмурт культуразэ утьыны кутске, городын гинэ валанэз сайка кадь. Нош гуртын улыса, пиналъёс кылзылэсь куштӥськыны туртто, ӟучомыны кутско. «Арт-экспедиция» Россиысь вань проектъёс пӧлын «Культурная мозаика малых народов и сёл» вожвылъяськонэ пыриськиз но вормисе потӥз. Солы улонэ пыӵаны луонлык кылдӥз. Егитъёс шаерысьтымы 5 гуртъёсы вуылӥзы, котькуд гуртын кык нунал улӥзы. Отчы 13 адями пыриськиз, котькудӥз аслэсьтыз ужзэ нуиз. Марина Сергеева гуртоосыз блог нуыны дышетӥз, фотое пуктылӥз, Таня Тихонова но Лиля Леонтьева эктыны но киужен вырыны дышетӥзы, концерт пуктыны юрттӥзы, Богдан Анфиногенов фольклор бичаз но концертын кырӟаз. Костя Никтитин но Надя Наговицына дорын нылпиос огдырлы актёръёс луылӥзы. Анна Образцова суредаськонъя мастер-класс нуиз но концертэ пыриськиз, Алина Крестьянинова куроен вырыны но турынлэсь ковёр лэсьтыны дышетӥз, фотое пукылӥз. Гриша Григорьев компьютеръёсы удмурт шрифтъёс пуктылӥз, ульчаын суредаськонэн тодматӥз. Мария Игонина тылэз бергатыса шоу возьматӥз. Мон но соос пӧлын вал, блог нуи но туспуктылӥ.
Кез ёрос, Александрово черкогурт
Татын милемыз дуно куноосты кадь пумитазы, кырӟанъёсын, перепечен но сюкасен. Школае интыязы. Собере вань экспедициен гуртэз адӟыны мынӥм. 1850-тӥ аръёсы Пижманка шур доры Апач гуртысь потэмъёс коркаос пуктылыны кутскиллям. Выль улон интызэс Кузямувыр нималлям. Татын музъемез чырсамлы кельше, пе. Огпол Кузямувырын улӥсь Афанасий Васильев шур сопала потэм но кызьпулэн вай вылысьтыз дунчылкыт Александр Невскийлэсь мудорзэ шедьтэм. Та учыр сярысь черкын ужасьёс но тодӥллям. Озьы 1901-тӥ арын Вяткаысь архитектор Иван Чарушинлэн мылкыдызъя но гурт калыклэн юрттэмезъя дунчылкыт Александр Невский нимо пу черк ӝутскем. Черклэн нимызъя ик Пижманка шур сопалэз Александровское шуыны кутскиллям. Совето вакытъёсы черкез Кезэ нуизы — отын со ӝуаз. Али гуртоос выль черк ӝутэмзы потэ, но коньдонзы ӧвӧл. Гуртысь пиналъёс уже туж мыло-кыдо пыриськизы. Вашкала эктон ӝытын мылысь-кыдысь тапыртӥзы, мур пуштросэн суредъёс пӧрмытӥзы но сцена вылын асьсэдыз етӥз возьматӥзы. Тросэз «Шунды» огазеяськонэ пырыны мылкыд каризы. Фольклор бичаны бускель Коваль гуртэ ветлӥзы.
Эгра ёрос, Кабачигурт
Кабачигуртъёс пумитазы пӧртмаськись пужым дорын. Со сюрес дурын нюлэскын сылэ. Мукет писпуос пӧлын куасьмем пужым кузё адӟиське: конгылё но зӧк вайёсыныз вылӥе жутӥське но вӧзысьтыз писпуосты ӟыгыртэ кадь. Пужымлэн йӧнатон кужымез но вань, пе. Войнаысь сӧсырмыса бертэм воргоронлэсь вӧсь луэмзэ буйгатэм. Гурт туж бадӟым ке но ӧвӧл, отын вань тыро-пыдо культурая юртсы, покчи ёзо школазы но нылпи садзы. Кабачигурт муниципал кылдытэт Сибирь тракт кузя кыстӥське. Ёрос центрлы матын ке но интыяськемын, 8,5 иськеме, Кабачигуртын 90 процентэз адямиос — удмуртъёс. Паймымон, кызьы гурт калык гажа удмурт сямъёсты, шудонъёсты, утьыны турттэ вашкала арбериосты. Удмурт шудонъёсын, гуртъёссылэн историенызы, выжы нимъёсын, удмурт пужыосын пичи буклетъёс но поттӥллям, музеязы вашкала арбериос люкамын. Бускель Герейгуртын, тодмо гожъяськись Пётр Поздеев вордскемын. Кабачигуртын солы музей усьтэмын. Гуртоос гожъяськисьлэсь корказэ но утьыны туртто вал но, ӧз пӧрмы — ёрос уксё ӧз висъя. Табере солэн коркаез куашка но пушнер пӧлы ыше ни. Мастер-классъёсы пиналъёс гинэ ӧз, бадӟымъёс но вуизы. Бурдъяськыса ик мониста лэсьтӥзы, библиотеказылы вотэсын бам усьтӥзы, суредаськизы. Одӥгез пинал милемын пыр ӟуч кылын вераськиз. Нош ачиз удмурт вылэм. Милемын ӵош ужамез бере интернетын аслэсьтыз бамзэ усьтӥз но анай кылын гожъяськыны кутскиз.
Якшур-Бодья ёрос, Кекоран
Кекоранэ вуыкумы, адямиос «Ворекъян» фестивальлы дасясько вал ни. Нылпиос бызьыло, бадӟымъёс реквизитъёс утчало — черкогурт резь-куаж поттэ. Мон пайми бадӟым школазылы но электика амалэн быдэстэм черксылы. Черк 1844-тӥ арын усьтэмын, 1910-тӥ арын сое будэтӥзы на — вӧзаз притык ӝутӥзы. Черклэн мугорысьтыз тӧдьы буёл ломдыса усьылэ ни ке но, со йӧн-йӧн сылэ. Арт-экспедиция «Ворекъян» фестивале пыриськиз. Надя Наговицына но Костя Никитин концерт нуизы, Мария Игонина тылын шокаса шоу возьматӥз, мукет нылъёс асьсэлэсь мастер-классъёссэс нуизы. Экспедициялы, вань фестивальчиослы кадь ик, бусыын изёно, тыл вылын чорыг лым пӧзьтоно луиз. Я, Улӥ Посьтол коть таиз уй туж кезьыт ӧй вал — кынмыны ӧм шеде.
Пичи Пурга ёрос, Улӥ Постол
Мон ачим Пичи Пурга ёросысь бере, та гуртэ вуыса, асме дорам кадь кожай. Милемыз пумитаз Алина Черновалэн семьяез. Татын кадь нокытын ӧз утялтэ милемыз. Гуртлэн интыез туж чебер: гурт майыгын сылэ, котыраз вырйылъёс но нюлэсъёс ӝутско. Азьвыл татын трос ӟуч гуртъёс вылӥллям. Но колхозъёс бырон вакытэ, ӟучъёс, уж утчаса, мукет азе кошкиллям. Уйпал гуртъёсын ӵошатыса, лымшор гуртъёс улэпесьгес: ульчаосын нылпиос шудо, тракторъёс ворттыло, адямиос ужало. Фольклор бичаса, ми Лиза апай доры пырам. Соловьёвъёс дорын куноын нылъёс перепеч кутыны дышетскизы, пиос гур эстӥзы. Озьы егитъёсты дышетон сяна, ми асьмеос но гурт калыклэсь пайда басьтӥськом. Мастер-классъёсы трос покчиос лыктӥзы. Нылпиос ӟабыль гинэ удмурт кылын верасько.
Алнаш ёрос, Чем-Куюк
Чем-Куюк гуртэ уйин вуим. Мукет нуналаз нырысь ик милемыз гуртэн тодматӥзы. Удмурт кылын дышетӥсь Елена Герасимовна Смирнова мар гинэ ӧз мадьы. Чем-Куюкын Федор Драгомиров 1912-тӥ арын тӧлвуко лэсьтэм. Ӵапак со тӧлвуко али Лудорвайын сылэ. Ошмес дорысь ми тубим Рублевка шуоно ульчатӥ. Татын, уго, бай адямиос уло. Песянайъёсын но песятайёсын ӵош ми тылскем вылын пӧсьтэм ӝук сиим, соослэн азьвыл улонзы сярысь юалляським. Мукет нуналаз, автобусэ пуксьыса, бырон калэ вуэм Ключёвка гуртэ кошким. Отын али пулэсь черк азьвыл черклэн фундаментэз вылэ ик ӝутӥське, выль черк быдэсак вужез кадь ик лэсьтӥське. Кирпичлэсь часовня гинэ вӧзаз ватсаське на. Школаын нылпи ансамбль но вань. Соос ваньзы Таня Тихонова но Лилия Леонтьева доры эктыны мынӥзы. Концертэ, чиль удмурт дэремъёссэс но монистаоссэс дӥсяса, вуизы. Богдан Анфиногеновлэн кырӟамезъя, шумпотыса тэтчазы. Концерт бырем бере Елена Герасимовна милемлы тау кылъёссэ вераз: «Шумпотӥсько «Шундылэн» сиосыз ми дорозь но вуизы».
Маша Векшина