«Радуга дружбы» — таӵе нимын ужрад радъяськиз 2-тӥ оштолэзе Вавож черкогуртын. Отчы вуылыны шуд усиз Лена Рябиналы но Лиана Зайцевалы. Туж паймиллям соос вавожъёслэн капчи мылкыдзылы но куно каремзылы. Пӧсь чаен, ческыт пыжиськемен, шулдыр удмурт кырӟанъёсын но эктонъёсын пумитазы. Бергес Элькунысьтымы пӧртэм огазеяськонъёсысь егитъёс тунсыко адӟытонъёс дасязы. Удмуртъёслэн ӝӧк вылазы кыллизы «Шунды» огазеяськонмы сярысь пичияк буклетъёс, закладкаос, удмурт но финн-угор кылъёсын газет-журналъёс, куролэсь, горд сюйлэсь но чильпам ужъёс. Вавож калык ас сюлмаськонзэ шараяз, будӥсь пиналъёссы удмурт кылынымы уг верасько шуыса. Но малы ке Лена сое ӧвӧл шӧдэм: тросэз анай кылмес тодо шуыса потэм солы.
Адӟытон бере Сарапулысь дышетскисьёс туж тунсыко, паймымон концерт пуктӥзы. Пӧртэм номеръёс возьматӥзы «Вуюись», «Видергебурт», «Веселуха», «Коми нурлары», «Чолман йук», «Белые росы», «Горенка», «Раздолье» но мукет ансамбльёс, «Одлар Юрду» но «Иман» огазеяськонысь егитъёс. Чузъяськизы кырӟанъёс удмурт, ӟуч, бигер, пор, армян, немец, еврей кылъёсын (шундынылъёслы тужгес но удмурт нылашлэн, Сарапулысь Таня Окороковалэн, кырӟамез кельшем. Куараез но туж паймымон, кылъёсыз но сюлме пыӵасесь). Возьматэмын вал казакъёслэн, азербайджанъёслэн, украинецъёслэн, бигеръёслэн, поръёслэн, грекъёслэн, немецъёслэн, армянъёслэн, еврейёслэн но, валамон ини, ӟучъёслэн но удмуртъёслэн костюмъёссы. Зэмзэ но, эшъяськон вуюись. Ужрад, кудӥз котыраз сомында пӧртэм калыкъёсыз люказ!
Нош концерт бере вакчияк пресс-конференция вал на. Татын котькуд огазеяськонысь егитъёс быгатӥзы сётыны юанъёссэс Л. Н. Бурановалы, О. В. Царегородцевалы, А. В. Шуклинлы, Вавожысь но Сарапулысь кивалтисьёслы. Кар но ёросъёс вискысь герӟетъёс сярысь трос юанъёс эскеремын вал.