Коми музъем вылын трос гинэ ортчо фин-угор калыкъёслэн огъя ужрадъёссы. Одигез соос полысь – 1-2 толсуре ортчем «FUROR» нимо фин-угор егитъёслэн калыккуспо форумзы. Отчы вуылизы асьме «Шунды»-осмы но.
Вазь чукна ик султыса, Удмурт шаерысьтымы дас кузя мыло-кыдо егитъёс вырзизы кузь сюрес вылэ. Дас ньыль час чоже кыстиськись сюрес кызьы но озьы сётиськиз ик, чидан оз чигы. Сыктывкаре уйин вуыса нош, кыче майбыр луиз гостиницаысь валес вылэ выдэм бере. Вань лыос ик гань-гань шокчизы кадь, сомында дыр чоже автобусэн лыктыса.
Форумлэн валтись ужез кутскиз чукнаысен ик. Лыктэм калыкез люказы тунсыко нимо Ыб черкогуртын интыяськем фин-угор калыкъёслэн этнокультурной парказы. Ужазы куинь секциос: одигез – кылъёсъя, кыкетиез – кивалтон (власть) удысъя, куинетиез – пичи калыкъёслэн но предприятиослэн кусыпсылы сиземын вал. Жутэмын вал уката но сюлэмшугъяськытись юанъёс.
Мед ушъяськем кадь луоз, но шумпотыса верам потэ – ми палан егитъёс золгес ужало. Оло, мукет калыкъёсын чошатыны ик уг яра, угось, фин-угор калыкмы портэм интыосын улэ, котькудизлэн аслаз йоспортэм шуг-секытъёсыз пумисько. Озьы ке но, докладъёсты кылзыса, валамон луиз – милям трос гинэ ужрадъёс та дырлы ортчытэмын ни (кылсярысь, Vkontakte вотэсо бам милям кемалась берыктэмын удмурт кылэ, нош куд-ог калыкъёслэн докладчикъёссы али но азязы сыче ужпум пукто на). Асьмелэнъёс котьку сямен татын но пиштизы:
Ольга Тронина (удмурт егитъёслэн мерлыко «Шунды» огазеяськонзылэн правлениезлэн тороез) вераськиз Удмурт Элькунысь егитъёсын ужамъя министерстволэн но «Шунды» огазеяськонлэн кусыпъёссы сярысь;
Лилия Кондратьева («Шунды» огазеяськонлэн ёзчиез) дасяз «ПорозМафи» творческой группалэн ужамез пыр удмурт гуртлэн тодмо луэмез сярысь доклад;
Егор Лекомцев (Эгра ёросысь «Шунды» огазеяськон ёзэтэзлэн ёзчиез) мадиз гуртысь егитъёслэсь ас валанзэс «Шудо егит дыр» лагерь пыр будэтон сярысь;
Дарали Лели («DаRT» газетлэн редакторез) ваньзы понна усьтон лэсьтиз – удмурт егитъёслэн «DаRT» газетсы вань!
Вератэк кельтыны уг яра, Комиысь чыжы-выжыосмы но интыязы уг сыло. Форум, кудаз ми ветлимы, радъямын вал коми егитъёслэн «МИ» огязеяськонлэн кичолтэмезъя. Кивалтисьсы – Яна Сажина. «Ог ко МИ – кодi?» шуыса вазисько соос ваньзылы. Ми сямен вераса, «ми ке ом – кин-о на?» Нош Перм улосвылысь Ухта карын Виктория Габова ар талэсь азьло кутскиз ужаны егитъёсын. Огазеяськонзы «Томулов» (егит дыр) нимаське. Кемалась ик уг ужало ке но, шонер вамышъёс лэсьто. Угось, егитъёс етиз Виктория кивалтисьсы доры ас мылкыдзыя лыкто, анай кылынызы тунсыкъяськыны но данъяськыны кутско. Сыче воштиськонъёс туж шумпоттыто.
Озьыен, секциослэн ужзы туж пайдаё ортчиз. Докладчикъёслэн тросэз дэмланъёссы пыртэмын вал резолюцилэн проектаз.
Ватсанэз трос гинэ вал. Дась резолюциез одно ик дэмламын вал ыстыны котькуд улосвылъёсы, кытын уло фин-угор калыкъёс, азьланяз сое улонэ пычатон понна.
P.S.: Пумаз пыртэм потэ форумын тодматскем эшмылэсь – эрзя кылъя егит дышетисьлэсь – Александр Данильчевлэсь кылъёссэ: «Шунтэ асьтэдыс но матысь адямиостэс самой шунытэныз маке вань дунне вылын – анай кылыдыны».
Люба Широбокова, Як-Бодья ёросысь «Шунды» ёзэтлэн кивалтисез.