Милям ёзэсмы ужаны кутскиз та арысен гинэ, озьы ке но куд-ог вамышъёс та дырлы лэсьтэмын ини. Кутскон понэмын вал «Вамыш» нимо Удмуртиысь егитъёслэн сменаенызы, кудиз ортчиз 2-6 толшоре «Дзержинец» лагерьын. Татчы пыриськиз милям 11 классын дышетскисьмы Иванова Ксенья. Ортчем дырыз сярысь со тазьы гожтэ:

«Мон та каникулъёсме туж пайдаё ортчытӥ «Вамыш» лагерьын. Лагере люкаськылизы удмурт егит активистъёс. Мыным отын кельшиз, малы ке шуоно трос муртэн эшъяськи, «Компьютерная графика но дизайн» удысъя тодон-валан басьтӥ. Со сяна, ужамы на психологен, кудӥз дышетӥз котькыӵе учырын асмес возьыны.  Озьы ик ӝытлы быдэ ортчылӥзы шудонъёс, представлениос  но дискотека. Жаляса верано, сменаез туж вакчи — вить нунал гинэ. Гуртэ бертэм бере, выль  эшъёслэсь мӧзмиське. Малпасько, кусыпъёсмес возёмы, пумиськылом шуыса.»

Нош 19-тӥ толшоре гуртамы ми ортчытӥмы аспӧртэмлыко «Удмурт ӝыт». Нырысь ик клубамы бадӟым экран вылын  учкимы «Узы-боры» удмурт егитъеёлы нырысетӥ комедиез, собере ортчытӥмы «Удмурт позыръяськон» — ӟучомем гуртамы нырысетӥ удмурт дискотека. Шумпотымон но пусйымон соиз: огшоры дискотекаосы туэ милям 10-20 пала адямиос гинэ люкаськыло на, нош удмурт дискотекаямы 50 пала лыктӥзы, вылаз ик егитэз но, арлыдоез но. Озьы ке но, туала удмурт кырӟанъёс ваньмызлы кельшо вылэм, ваньзы мылысь-кыдысь эктӥзы, шулдыръяськизы. Гуртамы но котырысь гуртъесын улӥсьёслэн курэмзыя 2-тӥ мартэ нош ик дасяськиськомы «Удмурт позяръяськон» ортчытыны, но таяз пӧртэм шудонъёсын, ӵошатсконъёсын но удмурт эктонъёсын, дискотекамы эшшо но тунсыкогес мед луоз шуыса.

Огъя дышетонъя Куреггурт шоръёзо школаямы 21-тӥ тулыспалэ ортчытӥмы Анай кыллэн нуналызлы сӥзем удмурт кырӟанъя «Жингырты, удмурт  кырӟан!» конкурс. Татчы пыриськизы 4 – 11 классын дышетскись нылпиосмы. Учкисьёсмы киоссэс жалятэк чабизы егит артистъёсмылы.  Сцена вылын чузъяськизы пӧртэм удмурт кырӟанъес, котькудӥз конкурсантмы басьтӥз диплом но диск, кудаз гожтэмын вал соослэн выступлениосынызы видеоролик.

Та нуналэ ик Глазкарын ортчиз этнодискотека, быгатэммыя озьы ик та мероприятиез но радъяны юрттыны тыршимы. Жаляса верано, егитъёс ожытгес лыктӥзы. Озьы ке но, лыктэмъёсыз умой дунъет сётизы радъям ужрадлы, тужгес но яразы ортчытэм шудонъёс но эктонъёс. Соин ик бадӟым тау шуэммы потэ Глазкарысь «Эшъяськон юртын» ужась Антонида Борисовналы, кудӥзлэн тыршемезъя ваньмыз та шулдыръяськонмы радъямын вал. Оскиськомы, азьланяз вань ёросысьтымы но бускель ёросъёсысь егитъёсмы мыло-кыдогес та выллем ужъёсы пыриськозы шуыса!

Мария Кайсина,

Глаз ёросысь «Шунды» ёзэтэн кивалтӥсь