Кыӵе луоз удмурт адями, 20 ар ортчыса? Тодоз-а со анай кылзэ? Воштӥськоз-а сямъёсыз, менталитетэз? Таӵе но мукет лэчыт юанъёслы валэктон утчамы ми — Удмурт егитъёслэн мерлыко «Шунды»огазеяськонзылэн ёзчиосыз Люба Киселёва, Алина Антонова, Ирина Агеева но Лена Рябина — Анай кыллы сӥзем нуналэ К. Герд нимо гимназиын. Секцимы нимаськиз «Удмурт in the future» («Удмурт азьланяз»).

Люкаськем егитъёсыз куримы люкиськыны командаослы, сётӥмы соослы ватман, кайчыос, клей, пӧртэм журналъёс но куримы удмуртлэсь вуоноысь портретсэ лэсьтыны. Вераны кулэ, дышетскисьёслэн малпанъёссы тунсыкоесь вал. Кин ке шуиз, калыкмы ковёр-самолёт малпалоз но быгатоз сое улоназ кутыны, мукетъёсыз оско, анай кылмы англи кыл сямен котькытын кутӥськоз шуыса. Портретэз вуттэмзы бере, командаос валэктӥзы, малы соос «выль удмуртэз» сыӵеен яке таӵеен адӟо, утчазы валэктон юанлы, мар соос асьсэос карыны быгатысалзы, лулчеберетмес, культурамес азинтон понна.
Ужмы пайдаё пӧрмиз. Оскисько, секциын ужам егитъёс вераськонмес, ӧс сьӧры потыса, уз вунэтэ шуыса, тыршозы маке умойзэ лэсьтыны, пичиен-пичиен бадӟым ужъёсыз быдэстыны.

Лена Рябина