Удмурт мылкыдчиос выль кылъёс кылдытонын вотэсӵошатскон мыто
Удмурт кылбурчилы но выль кылъёс кылдытӥсьлы – Кузебай Гердлы – вордскемез дырысен 115 ар тырмонлы сӥзьыса, МУШ ужан огин, «Удмуртлык» дэменлык но егитъёслэн мерлыко «Шунды» огазеяськонзы выль удмурт кылъёс кылдытон сярысь вотэсӵошатскон яло.
Солэн валтӥсь ужпумез – удмурт шӧмо аналогъёс асэстэм но кыламы каръяськымтэ кунгожсьӧрысь кылъёслы кылдытыны, удмурт кылын вераськисьёсты выль удмурт кылъёсыз кылдытонэ ӧтьыны, удмурт кыллы салкым шокчон сётыны.
Конкурслэн кутскемез 2-тӥ оштолэзьлы пуктэмын

Юри люкам ӧри пыриськисьёсын кылдытэм выль кылъёслы дунъет сётоз. Отчы пыро тодмо кылтодосчиос, гожъяськисьёс но газетчиос. Котькуд эксперт «ас сэрегысьтыз» берыктэм кылъёс шоры учкоз: С. Максимов но В. Шибанов кылдытэм кылъёсты грамматика индылэтъёсъя эскерозы, Александр Шкляев дунъялоз, макем выль кылъёс туала удмурт медиын уже кутымонэсь, Ярослава Шараева Нимкылъя но шонергожъяськонъя ӧри палась малпанзэ шараялоз, нош Лидия Нянькина – чеберзыя но жалемзыя (сочность).
Ӵошатскон быдэсак вотэсын ортчоз. Солэн луоз кык этапез. Нырысетӥяз вань мылкыд карисьёс «вакансия», «лид», «ритейл», «ангажированность» но мукет сётэм кылъёслы удмурт аналогъёс кылдытозы. Бӧрысь та берыктэм кылъёсты эскероз но дунъялоз нимаз эксперто ӧри. Та дыре ик сётэм кылъёслы дунъет сётозы огшоры удмурт адямиос но.
Дунъян ортчем бере, быръемын луозы 5 адямиос, кудъёсызлэн кылъёссы тужгес но трос куара люкалозы. Соос пичияк кузьымъёсын пусъемын луозы (выль удмурт книгаос, уксё тыронъёс, «Перепечкин» нимо кафеослэн сертификатъёсыз, Удмурт филармонилэн концертъёсаз билетъёс).
«Та ӵошатсконмылэн валтӥсь ужпумез – удмурт кылын вераськисьёслэсь йырвизязы выль кылъёсты кылдытон ласянь барьерзэс тӥяны, возьматыны соослы со огшоры но капчи мар ке шуыса», — шуэ ӵошатсконлэн одӥгез радъясез Артём Малых.