Башкортостанысь егитъёс асьсэлэсь огазеяськонзэс кылдытон пумысен пӧртэм ужрадъёс ортчытъяло шуыса, газетамы ивортылэмын вал ини, «Выль тулкым» сярысь но тросэз кылылӥзы ни луоз. Башкортостанысь удмуртъёслэн НКЦ — лэн «бурд» улаз кариськыса ужаны малпась Татышлы ёросысь Выль Татышлыысь егитъёс Калтасы, Янаул, Балтач ёросъёсысь егитъёсын пумиськонэ вуылыса пӧртэм ужрадъёс но радъязы. Ужез ӧръяны но егитъёс пӧлын уж нуыны басьтӥськизы НКЦ – ын ужась Ксения Гильфанова, Выль Татышлы гуртысь библиотекарь Ольга Миллиятова но культурая юртысь методист Алиса Мусакаева.Туннэ нуналэ огазеяськон рос – прос кылдытэмын ӧвӧл на ке но, нырысетӥ вамышъёс лэсьтэмын ни.
Башкортостанысь егитъёслэсь нырысетӥ вамышъёссэс чакласа но кутскем ужазы юрттон вылысь эшлыко киоссэс сётыны дась луэмзэс возьматыса, Удмурт шаерысь егитъёслэн «Шунды» огазеяськонзы но дурбасьтӥз. Южтолэзе Башкортостанысь егитъёс доры вуылыны но Татышлы ёросысь Выль Татышлы гуртын паськыт программа ортчытыны чакламын вал. Мынонзылэн валтӥсь мугез – Башкириысь удмурт егитъёслэн «Выль тулкым» огазеяськонэнызы пумиськон, со сяна Башкортостанысь удмурт егитъёслэсь мылкыдзэс ӝутон, кенешон но дышетскон площадка кылдытон луиз.
6 тӥ оштолэзе «Шунды» Башкортостан музъем вылын яркыт пиштӥз. Нырысь ик «Шунды» огазеяськонлэн ужъёсызлы презентация ортчытӥз но егитъёсын вераськиз- кенешиз «Шунды»- лэн тӧроез Ольга Тронина. Бӧрысь со люкаськем егитъёсын «Удмуртлэн туспуктэмез дас ар ортчыса» мастер – класс ортчытӥз. Ужрадэ пыриськыса, аслэсьтыз малпанъёссэ но ӵектонъёссэ вераз Удмурт шаерысь Эшъяськон юртын методист луыса ужась Дмитрий Корепанов. БР – удмуртъёслэн ИКЦ – яз ужась Ксения Миллиятова Башкортостанысь пӧртэм ёросъёсы потаса лэсьтэм ужрадзылы пичи презентация возьматӥз но ӵошен ужамзы бере егитъёс дискотекаын шулдыръяськизы. Ӝытэз тунсыко ортчытон сярысь сюлмаськизы но дискотекае пыриськизы Удмуртиысь тодмо «кизилиос»: Иван Белослудцев, Андрей Конышев но Башкортостанысь уӵы ныл Алёна Тимерханова. Алёна Удмуртиысь эшъёссэ ас дораз пумитаса куноян сярысь но сюлмаськиз на. Дискотекаез пайдаё нуизы Алексей Бегешев но Вова Вахрушев.
Озьыен «Шунды» — ен пумиськон трос выль ужъёс, трос выль эшъёс кузьмаз, бадӟым эшъяськон кылдытӥз, Удмурт шаерысь но Башкортостанысь егитъёс азе выль лэсьтоно ужпумъёсты пуктӥз, ӟеч эшлыко мылкыд кузьмаз. Оскон кылдэ: ӵошен кариськыса егитъёс трос пайдаё ужъёсты быдэстозы но «Шундыос» — лэн яркыт тылсӥзы но «Тулкымъёслэн» выль ужъёссы выль кужымен ӧръяськыны быгатозы, егитъёсмес огазеян, ӟеч но пайдаё ужъёсы валтон вылысь выль вамышъёс лэсьтэмын, со вамышъёс йыгмыт но сэзь мед луозы. Азьланяз та выллем пумиськонъёс трос мед луозы на, эшлыко кусыпъёс пумен юнмаса мед улозы. Мылкыд карем потэ Башкортостанысь «Выль тулкым» тросгес егитъёсты котыраз люкаса бадӟым огазеяськонлы мед пӧрмоз. Со огазеяськонлэн ужъёсаз котькуд мылкыд карись егит адями пыриськыны быгатыса аслэсьтыз малпанъёссэ шара вераны мед пӧрмытоз, Башкортостанысь пӧртэм ёросъёсын улӥсь удмурт егитъёсты огазеясь кужым луыса егитъёс пӧлын выль лидеръёслы усьтӥськыны но юнмаса будыны «стартовой площадка» выллем мед луоз.
Ирина Самигулова.
Татышлы ёрос.
