«Парсь кук» кивалтӥсьёс
«Шундыкар» лагерьын та арын туж трос выльдӥськонъёс: лагерьлэн интыез, выль вожатойъёс, ӧнерчиос но выль бускельёс. Со сяна, лагерьын дырзэс ортчыто «Парсь кук» эштосысь председатель Котков Алексей но со колхозысь ик валтӥсь агроном Шубина Настя.
«Парсь кук» эштос элькунысь одӥгез беромисез луэ. Эштос ӧжыт ке но уксё парсьёсты вордыса поттэ. Алексей Владимирович кивалтыны кутскем бере, «Парсь кукын» ужасьёс колхоз арберизэс вузаса узырмизы. Табере гуртазы быдэн кык машина но гидъёсазы быдэн дас парсь вордо. Аслаз Алексей Владимировичлэн одӥг пересь валэз но вуж уробоез гинэ вань. Со уробоен ик со «Шундыкаре» но лыктэм.
«Парсь кук» эштослы вормонъёс но бадзым азинсконъёс сӥзьыса, эштосын ужасьёс председательзэс но валтӥсь агрономзэс «Шундыкаре» шутэтскыны ыстӥллям. Нош эштосысь 34 парсь вордӥсь кышноосты Сьӧд зарезь дуре шутэтскыны келязы.
«Парсь кук» выль азинсконъёссы но вормонъёссы понна, Котков Алексейлы но Шубина Юлиялы «Шундыкарын» умой шутэтскон нуналъёс сӥзиськом. Нуналъёсты шулдыр но пайдаё мед ортчозы. Сьӧрады ваем парсь сӥльды лагерь смена пумозь сиыны мед тырмоз.
Сюлэм-шугъяськон. Юртты солы, Кылдысин!
Лагерьлэн нырысетӥ нуналаз ик шундыкарчиосты алама ивор вите ни вал: сиськонниын кесяськыны, вераськыны, чирекъяны но ымез усьяны ӧз лэзе. Ярам, сиськыны хоть лэзизы. «Лесная страна» лагерьлэн кивалтӥсьёсыз, сиён пӧрасьёсыз чалмытын улыны дышемын, лэся. Соин ик асьмеды сиськон дыръя шыпыт улыны косӥзы. Табере «ческыт мед кошкоз» но шуыса столовое пыремлэсь азьло верано луэ. Вахрушев Вовалы со чик уг люкеты: пияш сиськытозь 30 минут кыльытозь ик корпусъёстӥ «ческыт мед кошкоз» шуыса кесяськыса бызьылэ ни. Кужмо пыдъёс, юн тазалык тыныд, Вовчик, Инмар чырты висёнлэсь тонэ мед утёз!
Яратоно но гажано валтӥсь вожатоймы!
Тунсыко но аспӧртэмлыко нылпиослэн туннэ ӵукназы кутскиз. Тросэз 7 часкын ик султӥзы, малы ке шуоно яратоно но гажано валтӥсь вожатоймы Корепанов Дмитрий толон ваньзылы вераз, 7:30 часкын подъём шуыса. Нош ваньмызлэсь тунсыко ӵукнаез радъяськиз Коротаев Григорийлэн.
Вазь ӵукна ик пияш валес вылысь султыны султэм, нош сайканы вунэтэм. Озьы ик изьыса, пинь сузян арбериоссэ кутыса, пыласькыны мыниз. Одӥгез синмыз пытсаськемын на, йырсиез погмаськемын. Пыласькыкуз но сайкамтэ, куанер. Берлань мыныкуз ӵемтаськыса, али гинэ зорем вуэ ымнырыныз тальк! гинэ усем.
Оло ӵуказе но яратоно но гажано валтӥсь вожатоймы понна вазьгес султыса, ваньмы ик изем потыса, имнырымы дэрие усьыломы.
Вахрушев Павел но Матвеев Лев