Вахрушев Паша

Ӵукнаысен кисьтӥсь зор ик дугдӥз, шунды инбамын пальыштӥз «Проектирование» отряд «Шунко» проектэныз тодматыны кутскем бере. «Шунко» яке быдэсак «Шунды корка» — со удмурт шӧмын чебермам беседкаос. Проектировщикъёс кыксэ йылаз-пумаз вуттыны вуизы.

«Шункоез» усьтонэ «Лесная страна» но «Шундыкар» лагерьысь нылпиос, вожатойёс но кивалтӥсьёс пыриськизы. Удмурт йӧскалык дӥсен пӧрмытскем фольклорчиос вож гуждор вылын синэз мальдытӥсь сяськаос сямен поръязы люкаськем калык пӧлын.

Ужрад кутскытозь, лыктэмъёсты квасэн но вӧйын нянен утялтӥзы.  «Шунды» огазеяськонлэн Тӧроез Тронина Ольга  проектэз улонэ пыӵатӥсьёслы тау кылъёсты вераз но горд лэнтаез вандӥз. «Проектирование» отряд кузьымъёс но дасям: «Лесная страна» лагерьысь нылпиос мылысь-кыдысь «Шундыкар шудонъёсын» шудӥзы, эктӥзы но кырӟазы. Вань мылкыд карисьёс выль шутэтскон интыосын туспуктон лэсьтыны быгатӥзы. Ужрад пумын котькудӥз лыктэм ныл но пи ӵуж пульгытон шарик басьтӥз.

«Проектирование» отрядлэн ужамез син азьын: выльдэм беседкаос, тунсыко ужрад но шумпотӥсь нылпиос. Оскисько, «Проектирование» отряд вуоно арын но тазьы ик пайдаё ужалоз. Проектировщикъёслэн капчи киенызы котькуд отрядлэн отчетной ужез вӧй вылын кадь мед ортчоз.