Алигес ёрос клубамы КВН ортчиз. Ялэмын вал со вань егитъёслы, кудъёсыз быгато шулдыръяськыны, уг кышкало улонлэсь шекъёссэ возьматыны, умой сямъёсты нош эшъёссылы пыxатыны тыршо.
КВН ортчытъян йылол огдыре вуниз вал ини. Азьло аръёсы туж яркыт асьсэды возьматъязы Мукши но Якшур-Бодья школаосысь пиналъёс. Мукетъёсыз но бен бере оз кыльылэ. Но берпуметиез КВН ортчем дырысен ог витё аръёс лобpизы ини, тросэз басьтэм-люкам быгатонлыкъёс вунизы шуыны луоз. Азьло КВН-ын xошатскылэм пиналъёс будизы, школаысь кошкизы, нош пичиосызлы быгатэмзэс оз кельтэ. Озьы ке но, йырвизь сынан xошатскон емышо пормиз. Жаляса гинэ верано, пыриськиз отчы 4 команда: Чурысь, Вуж Pатчаысь ужасьёс егитъёс но дышетскисьёс, гимназиысь 7-8 классъёсын дышетскисьёс но Егитъёслэн парламентсылэн командазы.
Нырысети эскеронын ик адскиз: Чурысь лыктэм егитъёс зол дасяськиллям. Усьтоно ужпумез соос быгатыса верам сяна, артистъёс кадь вань выросъёсынызы возьматизы, учкисьёсты горак серекъятизы. Озьы ик бордазы возизы залэз мукет эскеронъёсын но. Мукетъёсыз 3 командаослэн чуръёслэн кадь оз пормы, но котькудиз маиныз ке но дэмpытиз. Быдэс xошатскон котыр улосэз утёнъя арлы сиземын ке вал, валтись тема «Тросгес кислород» («Больше кислорода») нимаськиз. Та темаез котькудиз ас понназ усьтиз. Гимназиысь пиналъёс “Pоз” нимо премия сётъязы, чуръёс эбекез но pозэз паръяны выризы, вуж затчаос эктись нымырез возьматизы, егитъёслэн парламентсы нылпи садэ ветлись пичиослы пормытскыса, воспитательзылы oч карыса, шудонъёссэс “сутыны” выризы.
Ваньзы быгатэмзыя тыршизы. Мае пусъем потэ на вылэм? Чурысь командаын шудизы черкогуртазы ик улись дышетскисьёс но ужасьёс, озьы ик Вуж Pатчаын но гимназиын. Нош Егитъёслэн парламентазы пыро быдэс ёросысьтымы егитъёс: Xошкытысь, Альманысь, Якшурысь, Сюровайысь но Якшур-Бодьяысь дышетскисьёс но ужась егитъёс. Малпалэ ай, кинлы тужгес но секыт вал огдыре люкаськылыны, котькуд нунал райцентре ветлыны. Конешно, портэм гуртъёсысь ёзчиослы. Озьы ке но, егитъёс дасязы учкымон но дунъямон программа. Маиз шумпоттэ, тросэз полазы — удмурт кылэз тодисьёс: Роман Вахрушев, Марина Дюкина, Ольга Лебедева, Любовь Широбокова, кудиз ваньзэс люказ, огазеяз но сценарий гожтиз. Табере соослэн сыxе опытсы вань, куке номырлэсь но кышкыт овол ни, азьланяз золгес дасяськыны мылкыдзы гинэ позе. “Возьматом ай азьланяз” — шуо соос али ик. Нош мынам йырам мукет малпан пушъе: азьланяз ёросамы удмурт КВН но ортчытыны луоз ук, только xуш-паш, дырти-вылти овол выроно, ваньзэ лад-лад малпаса. Пушйись малпанлы пашмыны гинэ овол сётоно.
Вера ВАХРУШЕВА
