26 оштолэзе Эшъяськон юртын Удмуртиын улӥсь финн-угор егитъёслэн фестивальзы ортчиз. Со вал пор батырлэн нуналэзлы сӥземын. «Шунды» дэменлык но пор но мордва егитъёсын ӵош туж мыло-кыдо пыриськиз та ужрадэ. Трос тыршоно луиз асьмеды «Айкай», Надежда Уткина, Казаньысь кун консерваториысь ансамбль азьын умоен возьматон понна. Ма мукет финн-угор ӵыжы-выжыосмы но туж ӟеч дасяськиллям.
Удмурт батыръёс учкисьёсты сайкатӥзы асьсэ визиткаенызы. Донды батыр но солэн пиосыз шӧдтэк шорысь туала улонэ выжизы но соин калыкез паймытӥзы. Нош «Солдатэ келян» йылолмы залын котькуд пукисьлэсь лулпушсэ бугыртӥз, дыр, сыӵе уга удмуртъёслэн келян сямзы, кырӟанъёссы. Но, поръёсын но мордваосын ӵошатыса, удмурт егитъёс та йылолэз мӧйы муртъёстэк возьматӥзы, соиз но, вылды, аспӧртэмгес вал. Анисимов Колямы финн-угор батыръёс пӧлын удмурт батрыез туж кужмоен возьматыны быгатӥз. Нылашъёсмы но бере ӧз кыле, учкисьёсты удмурт калык дэремзэ тодматӥзы. Нош «Неофолк» этно модая студие ветлӥсьёс паймытӥзы на, кыӵе туала мода но тунсыко луэ, отчы калык дэремысь люкетъёссэ пыртӥськод ке. Пӧрам сиён но удмуртъёс дасязы, финн-угор ӵыжы-выжыоссэс куноятон понна.
Та ужрад возьматӥз, кыӵе котькуд финн-угор калык аспӧртэмлыко, но соин ӵош ик асьмелэн трос одӥг кадез но вань шуыса, но таӵе ужрадъёс туж юртто асьмелы ог-огмес ӟечгес тодыны но эшъяськыса улыны.