Шудо егит дыр… яке кӧня ке кыл «Шунды сАлянка» сярысь

Ой, кыӵе вить часкын ӵукна султэме уг поты! Изь но изь вал шутэтскон нуналъёсы. Но поезд уз возьма. Собере эшъёсын кузь сюрес но капчигес йӧтэ.
Озьыен, шундыос Алнаш ёросысь Кузёбай гуртэ шонто! «Шунды» огазеяськонлэн радъямез улсын «Шунды сАлянка» куинетӥзэ ортче ни: нырысетӥзэ егитъёс Шаркан ёросысь Сосновка гуртэз шулдыртӥзы, собере − та ёросысь ик Пороз гуртэз.
Кузёбай калык паймытӥз, тужгес но егитъёссы — мыло-кыдоесь, лякытэсь, ужаны но, шулдыръяськыны но быгатӥсесь. Но тужгес но устоез соиз – Кузёбай егитъёс анай кылзэс гажало, вашкала сям-йылолъёсты тодазы возьыса уло. Ми но ӵапак егитъёслы сӥзем одӥгаз вашкала сэбедэ шедим. Котькуд ар 1-тӥ куартолэзэ егитъёс гурезь йылэ тубо – Гурезь сектан ортчыто. «Ма, собере 1-тӥ куартолэзе ваньмыз утялтӥськыны пото ук! Анай-атайёсты гурезе тубемлэсь уг ало-а?» — юатэк ӧй чида ни. «Ма асьсэос но егит дыръязы тубало вал. Чидано луэ ни», — гурак серекто егитъёс.
Шулдыръяським ке, шулдыръяським ни гурезь йылын! Арган шудэм улсын кырӟамы, эктӥмы, удмурт шудонъёсын шудӥмы. Нош кыӵе ческыт инкуазьын чорыг лым кошкиз! Чиньыдэ нюлод! «Нош марлы сӥземын та сям-йылолды?» – юынъёсыным нош ерисько. Мыным лад-лад валэкто: «Гурезьмез сӥлы кариськом. Толалтэ нискылась нылпиос но шуккиськыны медаз шеде, гужем боры бичасьёс но тыро кудоосын мед бертозы, пудо но бамалъёсысьтыз сиён мед шедьтоз». Егитъёс Ӟатча гурезьзэс тау карыса, сюдыса-сектаса кошко.
Нош ӝытазе шунды нылъёс но пиос Кузёбай калыкез шулдыртӥзы: Юлия Никитина кырӟанъёссэ быдэстӥз, Дима Софронов но Вова Вахрушев такмакъёсынызы шулдыртӥзы, «Неофолк» студия йӧспӧртэм дӥсьёсын тодматӥз… Кырӟанъёс, эктонъёс, кылбуръёс, пӧртэм крезьгуро арбериосын шудэмъёс – ваньмыз пӧлэстӥськыса кошкиз. Зэмос солянка! Но тужгес но Кузёбай калык арганчимылы синмаськиз – Кузебай Герд нимо гимназиын дышетскись пияшлы Алексей Софроновлы. Гурезьысен но, концертысен но гуръёсты арганэныз кисьтӥз ке, кисьтӥз ни!
Концерт бере удмурт дискотека радъямы на. Татын но паймиськиз: ӟуч яке кунгож кырӟан лэзиськомы но – егитъёс мӧзмыны ик кутско кадь, нош удмуртэз дыръя – тапырто но, шулдыръясько но.
Уйшор бере но Кузёбай егитъёсын люкиськыны ӧм ӵыдэ ай: ваньмы ӵош гитара улсын кырӟаса пукимы, вераськимы.
Шулдыр, капчи мылкыдын Алнаш палъёсысь бертӥ. Кыл йылам нош берпуметӥез ӵош быдэстэм кырӟанмы весь берга: «Ой, шудо егит дыр…»

Ольга ТРОНИНА


Тросгес туспуктэмъёс татын: http://vkontakte.ru/album-1282238_134007491

 

Добавить комментарий