Е.Г.А. (Егор Гребенкин)
«Ёлочкалы»-50, Историысь справка
Таяз арын лагерьлы тырмиз 50 ар. Пуктэмын со 1962 арын. Азьло лагерь «Нефтемаш» заводлэн киулсаз вал. Отчы шутэтскыны ветлылизы заводысь ужасьёслэн нылпиоссы гинэ. Нош 2009 арысен лагерь выжиз Удмурт Элькунлэн Егитъёсын ужанъя министерстволэн «киосаз». Табере «Ёлочкае» шутэтскыны вуыло быдэс элькунысьтымы нылпиос но егитъёс.
Кукри-Баба доры куное
Таяз гужеме мыным удалтиз мукет удмурт нылъёсын но пиосын лагерьын шутэтскыны. Татчы милемдыс ваизы бадзым автобусъёсын. Вуэм берамы нырысь ик син азям йотизы жужыт пу капкаос. Сычеоссэ мон нокытысь но ой на адзылы. Йылосэсь, вашкала дауръёсысь кадесь. Паймытизы соос монэ аспортэм луэменызы.
Пыронтиын ик сылэ вал охранник. Солэн аслаз выли будкаез вылэм. Кыче ке выжыкылысь ожгарчи кадь со потиз мыным. Сак учке со дортиз ортчисьёсты.
Уката но тунсыко потиз мыным, ма меда пу капкаос сьорын. Кема ик возьмано оз луы. Мукетъёсыныз чош пырем берам, валай, татын быдэс архитектурной комплекс пуктэмын шуыса. Сюрес кузя мынисько но малпасько: «Коня сюрс адями меда тати ортчиз ни. Оло, миллионъёс но?..» Пумиськизы вуж зечыранъёс. Нош таиз ма?! Зэмос зуч выжыкылъёсысь избушка сылэ. Только курег пыдъёсыз овол, Кукри Бабалэн коркаяз кадь. Таиз йыг-йыг сылэ. Матэгес лыктыса чыртые куасалске ни вал йылзэ утчантиям. Жаль гинэ, отчы пушказ пырыны уг яра. Сое выльдоно ни шуыса, ремонтэ пытсаллям.
Тунсыкъяськонме ватэме оз луы, лагерьлэн начальникезлэсь юалляськи со выжыкыл корка сярысь. Азьло отын вал лыдзиськонни но кружковой комнатаос. Оскем потэ ик, матысь дыре сое тупатозы, но коня ке ортчыса мон нош ик вуо татчы — Кукри Баба доры куное.
КУНОПУМИТАН ДУННЕ
Милям лагерямы вань Индиысь куноосмы – Коустун но Маюр – «Страна Джардиния» отрядэзлэн вожатойёсыз. Милям куноосмы лыктизы татчы калыккуспо программая вожатойёсын ужаны.
Соослэн туссы косэ милемыз соос шоры одно ик учкыны. Коустун но Маюр котьку мыняло.
Зуч кылэз соос урод тодо вал. Нош татчы вуыса, тодон-валанъёссэс муромытизы ини. Мон тоди, Коустун но Маюр будос сиён гинэ сиё шуыса. Мон нырысетизэ тодматски индусъёсын. Малы туж шумпотисько.
ӞозИК (Иван КУЗНЕЦОВ)
ВАНЬ ЮАН
Столовойысь гажано ужасьёс, палэнысен ти шоры учкыса, ти лекесь шуыса кожалод. Уката но куке нылпиос сиськем беразы тусьты-пуньыоссэс жок вылэ тырыны кутско. Тани кызьы соос валэктизы вожпотонзэс:
— Милям вожмы потэ малы ке шуоно нылпиос тусьты-пуньыоссэс жок дуре пуктыло, нош тусьты-пуньыос усё но пилисько, ми соос понна кыл кутиськомы ук. Мусо нылпиос, пожалуйста, эн пуктылэ тусьты-пуньыдэс жок дуре но сиыса быдтэ ваньзэ, ма тыро тусьтыосады. Сиён – со тиляд кужымды.
Аня МаксимЧи (Аня Максимова)
ОГЪЯ ШУЛДЫРЪЯСЬКОН, Россиялэн егитлыкез – азьлань!
Дас кыкети инвожо – асьме вордиськем странамы понна бадзым нунал. Соку ортчиз Россиялэн асэркын луэмезлэн нуналыз. Россия – со милям вордскем интымы, со милям дормы, кытын ми будим. Та бадзым праздникмылы сиземын вал концерт. Кутсконэз азьын тросэз нылпиос возьмаса пуко вал шулдыръяськонлэсь кутсконзэ. Ожыт ортчыса, соос доры пыризы «Ёлочка» лагерьлэн директорез Алевтина Кислухина но ачиз егитъёсын ужанъя министр Владимир Соловьёв. Вераськемзэс ваньзы сак кылзиськизы. Собере котькуд отряд тодматиз асэныз, девизъёссэс кеськылыса. Люкаськемъёс понна дасямын вал тунсыко сценарий. Кинъёс гинэ оз поталэ сцена вылэ: нылпиос но, вожатойёс но, индийской куноос но. Быдэс зал огдырлы шулдырскиз сюлэме пычась кырзанъёсын но портэм эктонъёсын. ИВОРЪЁС
16 инвожое асьме доры вуозы выль тунсыко куноос – «Шундылэн» ёзчиосыз но эшъёсыз Алексей Бегешев (Чумолё Олёш) но Дмитрий Корепанов. Соос возьматозы публичной выступлениея но финно-угор эктонъёсъя мастер-класс. Дырды одно ик ортчоз шулдыр но пайдаё.
17 инвожое ортчоз фото-кросс «Ул но но чеберскы, Музъеммы!». Ужрадэ пыриськыны быгатозы соосыз, кинлэн вань фотоаппаратъёссы – телефон яке цифровик. Лагерьлэн территориетиз бызьылыса, котькуд отряд кулэ луоз утчаны тунсыко но йоспортэм кадръёсты. Фотографиос одно ик мед «вералозы», инкуазез утёно шуыса. Вормись басьтоз тунсыко кузьым.
19 инвожое ортчоз «Две звезды» конкурс. Та ужрадэ пыриськыны быгатозы эктись нылпиос. Дасяны яра портэм направлениен эктонъёсты.
Юлиана (Юля ВОРОНЧИХИНА)
«ПОСЬТУРЫН»
Туннэ 15 инвожое ваньзы отрядъёс пыриськизы «Минута славы» вожвылъяськонэ. Милям отрядмылэсь отчы пыриськиз Келарева Полинамы. Со милям пичи ке но, самой зеч кырзаз. Костюмез но чебер вал.
— Полина, тон сцена вылэ кышкаса потид-а?
— Ожыт но ой кышка.
— Кыче кырзан кырзад?
— «Пось турын» нимыз.
— Кырза вал одиг ке но куплетсэ:
Пось-а мар-а та турын.
Уд нимыз ик посьтурын.
Кутыса эскероно,
Сямыныз тодматсконо.
— Ми ваньмы туж зол шумпотимы, куке жюриос веразы, тон гран-при басьтид шуыса. Ачид нош возьмад-а сычезэ?
— Мон малпай вал, вормисьлы гинэ грамота сётозы шуыса. Чик ой малпа монэ но висъялозы шуыса.
— Ми ваньмы шумпотиськомы тон понна но сюлмысь зечкыласькомы тонэ вормонэныд.
ОКИ но Юлиана (Оксана Перевощикова и Юля Ворончихина)
Милям «Тулкым» дуннеямы 14 инвожое «Шундыысь» куноос вуылизы. Ма соос ортчытизы но кыче кельшизы вералозы асьме нылъёсмы но пиосмы. Кристина Савельева: — Куке милемлы веразы, дорамы куноос вуозы шуыса, ми ваньмы шумпотимы. Ачим уката но шумпоти Николай Анисимовлы. Куараез туж кельше. Кырзаны кутскем бераз, паймыса ик кылзи, кызьы куараез чузъяське. Шумпотисько, мон солэсь автографсэ кури шуыса. Полина Келарева: — Мыным ваньзы яразы. Эшшо но зол мыным кельшизы шудонъёс. Тужгес мыным кельшиз Жанна. Со гань-гань сямо потиз мыным. Лад-лад ваньзэ валэктиз, шудонъёс ми понна ортчытиз. Тунсыко потиз, кызьы ог-огдэ шодонъя тренинг ортчиз. Султизы кык адямиос. Ог-огзы вискын ньыль вамыш вал. Одигез тыбырыныз сылиз, мукетыз ас понназ «Учкы мон шоры» малпаса улиз. Тыбырын сылись шодыны кулэ вал, ку мукетыз сое берыккыны куре. Интуиция татын зол гинэ ужаны кулэ вылэм. Елена Шудегова: — Мыным но яраз Жанна. Со туж умой нуиз шудонъёс. Трос вылезлы дышетиз. Театрлэн аспортэмлыкъёсыз сярысь мадиз. Тунсыко потиз, кызьы артистъёс сцена вылэ потон азьын дасясько. Мынам вал лачак эмоциос. Эшшо мыным яраз, кызьы сётъязы автограф. Аня Полякова: — Мыным ваньзы куноосмы кельшизы. Шунды гурез ваньмы чош гожъямы но кырзамы. Берпумети нуналаз нош огъяськыса озьы ик ваньмы чош кырзаломы. Куноосмылэсь ваньзылэсь автографъёссэс кельтыны куримы. Пумиськон тунсыко ортчиз.
ОКИ (Оксана ПЕРЕВОЩИКОВА)
ТАЗАЛЫК ДЫР , Кар бере кар
Лагерямы котькуд нунал ортчо портэм спортивной шудонъёс. Нылпиослэн мугор-ёзви тазалыксы понна кыл кутэ Эльдар Вазихович – физкультурая дышетись. Одигез тунсыко шудон, кудиныз асьмеос шудимы, нимаське городки. Со сярысь ик ми юалляськимы физрукмылэсь:
— ГЗГ – со зуч калык шудон, кудиз кельше лапталы но американской бейсболлы. Та шудонлэн вань аслаз правилоосыз. Одигез команда шукке пичи тупез но бызе. Нош мукетыз, уг сёты бызисьлы азьпалскыны. Одигез команда куронъёсты уг эскеры ке, воштисько интыосынызы. Нарушениос полы пыро аут но заступ. Эшшо командаос воштиськыны быгато куке шуккем пичи туп лобзыкуз городокъёс пушкын сылтись командалэн шудисез киосыныз кутэ. Сыче учыр нимаське «свечка». Озьы ик командаос воштисько, куке бызись адямиез тупен йото.
Балл та шудонын команда басьтэ, бызись шудисьёссы куронъёсты сэрытэк ньыльзэ городокез ортче ке.
ТАЗАЛЫК ДЫР, Бадзым но пичи туп
Одиг нунал куспын (14 инвожое) асьме отрядамы ортчизы куинь портэм спортивной шудонъёс: волейбол, снайпер, но футбол. Вожвылъяськон мыниз тямысэти отрядэн.
Снайпер ортчиз нылъёс куспын. Шумпотыса верам потэ, асьмеос азьпал потизы шуыса. Ми «тулкымъяськыса» висим соос понна. Маиз висъямон, куке ми кутскиськомы вал кесяськыны «Котьку мед пиштоз Шунды!» но «Котьку мед луоз Тулкым!» нылъёс одно ик вормыны кутско вал. Сыче зол вылэм Шундылэн кужмыз.
Эшшо пиос но нылъёс шудизы волейбол но футбол. Пиос милям азьло нюръяськизы футболъя. Соос шудизы зэмлыко, нош тямысэти отрядысь пиос шудизы шонертэм: донгалляськизы но подножкаос пуктылизы.
Собере нылъёс но пиос мынизы шудыны волейболэн. Снайпер но футбол бере мугор-ёзвиоссы кыдаллям вылэм. Соперникъёсмылы ожыт но оз сётэ гань-гань улыны. Туж кема тыршимы кутыны вормонэз ас киямы, но луиз ничья. Ту-у-уж ми жадим со нуналэ. Озьы ке но, мылкыдмы капчи вал. Угось ми бадзым но кужмо команда!
ШИШ КУТОД
Полдник бере 13 инвожое ортчизы «Шиш кутод» нимо бызьылыса шудонъёс. Со ортчиз стадионын. Пиос но, нылъёс люкиськыны кулэ вал куинь командалы: гордъёс. лызъёс но вожъёс. Кыче гинэ конкуръёс оз малпалэ вожатойёсмы. Нырысети этапын мешоке пыроно вал собере тэтчаса вожатой дорозь мыноно. Капчи гинэ овол вылэм со – тэтчаса мыныны, куке пыдъёсыд гозыен керттылэмын кадь.
Мукетыз конкурс серекъятэк оз ортчы. Вожатойёс доры бызьыса мыноно, собере йыре кышет керттоно но куинь пол шуоно: «Кыче мон чебер». Пиос кышетэз олокызьы но дисяллязы, нылъёслэсь адзем каремъяськылизы. Тупен бызьылонъёс но шулдыр гинэ ортчизы. Куд-огъёсызлэн дыртонтиязы тупсы весь пегзыны турттэ вал.
Бызьылыса гинэ ом улэ. Суредаськыны но луонлык сётизы. Вить секундлы возьматизы суред – отын Вукузё суредамын. Кинлэн ма йыраз кылиз – сое ик асфальт вылэ кельтиз. Ма пормиз «лызъёслэн» — адзиськоды туспуктэм вылысь. Самолёт но лэсьтыны выримы. Минут куспын кагазлэсь лэсьтэм аслобетъёс лобзизы ик. «Вожъёслэн» самолётиксы бурдъяськыса кадь самой кыдёке вуиз.
Пумаз нош ваньмылы бызьылоно луиз. Котькуд команда возьматиз, кыче соос бызьылыны быгато, ог-огзы борсьы киосынызы басьтиськыса. Оглом вераса, вормиз эшьяськон!
